Sukna misupak sa kiha batok cogtas

CEBU, Philippines - Ang pundok sa mga komentarista ug mga sakop sa Tri-media sa Sugbo milig-on og resolusyon nga nagsupak sa lakang sa kapolisan pagpasaka og kiha batok kang Danilo Baguio Cogtas, blocktimer sa DYRB sa pasangil nga kini ang tinubdan sa tsunami scare niadtong Pebrero 6, 2012 sa hapon nga nakapalisang sa kaliboan ka molupyo sa dakbayan sa Sugbo.

Sa samang higayon sa maong resolusyon giawhag niini ang kapolisan sa dakbayan   ug sa lalawigan sa Sugbo sa pagbaton og tukmang kahibawo sa pagpahigayon og imbestigasyon sa dili pa isang-at ang kaso batok ni kinsa mang tawo nga makalapas sa balaod.

Base sa hiniusang resolusyon nga gilig-on sa mga sakop sa hunta sa Sugboanong Komentaristang Nagpakabana (SUKNA) ug sa Cebu Tri-Media Association (CTMA) lig-ong gisupak niini ang pagtumbok sa kapolisan kang Cogtas nga maoy tinubdan sa tsunami scare.

Gibatbat sa Resolution ’02-16, serye sa 2012 nga ang kaso nga gisang-at sa kapolisan batok kang Cogtas, hungaw kaayo kay ang tinuod, dili siya maoy tinubdan sa tsunami alert kundi naggikan kini   sa Philippine Institute of Volcanology and Seismology (Phivolcs) ug gisibya sa TV Station sa ABS-CBN ug lain pang duha ka estasyonan sa telebisyon ug mga estasyonan sa radyo walay labot ang DYRB.

Unya gawas niini, may mga pribado pang mga sakyanan, mga tawo nga nagsakay og taxi, may nagsakay pa og mga PUJ, may mga otoridad pa sa balaod nga unipormado ug daghan pa nga nagdagan-dagan palibot sa syudad sa pagpahibawo kalabot sa tsunami alert nga ilang nadunggan gikan sa Phivolcs.

Matud pa sa maong resolusyon nga kutob sa nakadungog sa maong impormasyon lakip na ang kapolisan pulos nangalisang.

Ang maong resolusyon nga gipirmahan nila ni manlalaban Christie Anne S. Conales, ang presidente sa CTMA ug Edison Rey Batiquin, ang presidente sa Sukna, misaway sa kapolisan gumikan sa pagpasaka og kiha kang Cogtas bisan dili siya maoy tinubdan sa tsunami scare.

Matud pa sa maong resolusyon nga kadaghan na mamatud-i nga ang kapolisan mosang-at dayon og kaso batok sa mga tawong inosente bisan wa pa nila matino kung may  sala bang tinuod ang ilang gikiha.

Pipila niini mao ang pagpasaka sa kapolisan batok sa usa ka magtiayon kinsa maoy una nilang gipasanginlang midagit ug mipatay sa batang si Ellah Joy Pique, ug sa security guard sa Cebu City Sports Complex nga gipasanginlang mikawat sa Pl.6 milyones   nga pundo sa Sinulog Foundation, Inc., diin gumikan sa kakuwang sa kapolisan og ebidensya , pulos naabsuwelto   ang maong mga kaso.

Tungod niini gitataw sa hiniusang resolusyon sa Sukna ug CTMA nga dako silang supak sa pagkondenar kang Cogtas nga gihimo sa kapolisan , media, ug sa publiko ug gipaboran nila ang katungod ni Cogtas sa pagpatugbaw sa ka-inosente niini ug sa pagmatuod nga wala siyay sala sa mga pasangil atubangan sa husgado. (BANATNEWS)