CEBU, Philippines - Ang babayeng nadakpan sa kapolisan nga mipayuhot og gidiling drugas gibalhin na ngadto sa Cebu Provincial Detention and Rehabilitation Center(CPDRC) sa barangay Calunasan sa dakbayan sa Sugbo. Kini human kapasakai og kaso ang nahisgutang suspetsado kinsa unang nabalhug sa prisohan sa lungsod sa Cordova.
Si SPO1 Laurencio Wagwag sa kapolisan sa maong lungsod nga nahinabi sa Banat News nagkanayon nga si Evangeline Sanchez, hingkod, nga taga barangay Bangbang sa nahisgotang lungsod anaa na karon sa CPDRC.
Matud pa ni SPO1 Wagwag nga si Sanchez nadakpan sa checkpoint sa kapolisan kinsa mipara sa gisakyan niining motorsiklo .
Dihang gisusi ni PO3 Manfred Arafat ang ilawom sa lingkoranan sa motorsiklo ni Sanchez, didto nadiskobrehan ang siyam ka pakete nga shabu nga dala niini.
Gisakmit diha-diha sa mga otoridad ang maong mga shabu ug gibalhug usab dayon sa prisohan ang suspetsado.
Dugang pa ni SPO1 Wagwag nga gipasakaan usab dayon nila kini og kaso sa paglapas sa Republic Act 9165 kon Comprehensive Dangerous Drug Act of 2001 .
Human ikasang-at ang maong kaso gihatod dayon nila ang maong suspetsado ngadto sa CPDRC nga maoy pirmanente niyang bilanggoan samtang magpadayon ang husay sa iyang kaso. (BANAT NEWS)