Balay sa PNP official gilungkab

CEBU, Philippines - Wala palabya sa mga kawatan ang panimalay sa usa ka opisyal sa kapolisan diha sa lungsod sa Consolacion diha sa Monteverde Subdivision sa barangay Lamac nga gituohang nahitabo sa tungang gabii hangtod na sa alas-5 sa buntag niadtong Lunes. 

Si Sr. Supt. Agusto Marquez nga kanhi hepe sa Regional Intelligence Division (RID) sa Police Regional Office-7 apan karun atua na madestino sa Directorate for Investigation and Detective Management sa Camp Crame, nasurpresa alas-10 sa buntag niadtong Lunes human iyang nasayran nga gilungkab ang iyang balay.

Si PO3 Efren Fuentes miingon nga nahibaw-an lang kini human ang asawa sa opisyal nga si Faith Evelyn nangita na sa iyang bag nga nawagtang.

Si Chief Insp. Alvin Balio, pangulo sa Crime Scene Investigation nagkanayon nga duna sila’y nakuhang fingerprints.

Atol sa ilang gihimong pakisusi nahanaw ang $3,100, P15 mil cash, Canon camera nga nagkantidad og P70 mil nagkalain-laing klase sa mga cards ug ATM cards.

Ila usab nakit-an ang passport sa asawa ni Marquez mga 300 metros sa gawas na sa balay niini. (BANAT NEWS)