69-anyos naghikog tungod sa uyab

CEBU, Philippines - Usa ka 69-anyos nga lalaki ang nagpusil sa iyang kaugalingon ug namatay tungod sa problema sa iyang hinigugma kagahapon sa buntag diha sa usa sa mga barangay sa lungsod sa Carmen.

Si PO3 Edgardo Papaya, ang desk officer sa Carmen police station sa pakighinabi sa Banat News nagkanayon nga ang naghikog usa ka biyudo ug nagpuyo sa maong lugar.

Matud pa ni Papaya base sa imbestigasyon sa grupo ni SPO2 Danilo Laurente nadiskubrehan ang patay’ng lawas niini diha sa higdaanan sa lawak niini pipila ka segundos human sila makadungog og usa ka buto sa armas.

Sumala pa ni Papaya diha sa payag sa gawas sa ilang balay ang anak sa namatay uban sa mga kabanay dihang nakadungog sila og usa ka buto sa armas gikan sa ilang balay.

Tungod niini ilaha kining gisusi ug sa ilang pagtan-aw sa lawak sa ilang amahan patay na kini ug dunay usa ka paltik nga kalibre 38.rebolber nga nakit-an duol sa tuong kamot niini.

Nakuha usab sa mga imbestigador ang usa ka suicide note nga giingong hinimo sa namatay nga nanugon sa mga kabanay nga pahibaw-on ang hinigugma niini sa nahitabo kaniya.

Sumala pa ni Papaya base sa pamahayag sa mga kabanay sa namatay mibutyag kining duna sila’y wala pagkasinabtanay sa babayeng hinigugma niini ning nangaging mga adlaw.

Gituohan karon sa mga imbestigador nga mao kini ang hinungdan sa paghikog niini.  - BANAT NEWS