CEBU, Philippines - Tungod sa kasaba sa lugar usa ka tigbakayan ang gironda sa mga sakop sa City Intelligence Branch inubanan sa mga sakop sa Special Weapons and Tactics (SWAT) kagahapon sa hapon sa sitio Kamasi barangay Mambaling.
Ang hepe sa CIB Supt. Romeo Santander mibutyag nga nakadawat sila og reklamo sa molupyo sa maong lugar nga adunay nag-operate nga pribadong tigbakayan sa usa ka compound sa maong lugar.
Apan pag-abot sa mga polis naglumbaanay og pagpanggawas ang mga kalalakin-an sa maong compound nga gipanag-iya sa usa ka Reynaldo Castillo.
Si Castillo mirason nga gihimo ang maong ruwedahan alang sa umaabot nga pista sa ilang lugar ug aduna kini permiso sa ilang barangay ug gani gipahuwam pa sila og tent aron dunay kapasilongan.
Gitun-an pa sa kapolisan kung unsay kasong masang-at batok kang Castillo ug susihon pa usab nila kung duna bay tulubagon ang barangay kapitan nga si Rodulfo Estella tungod sa pagtugot niini sa maong sugalan. (BANATNEWS)