Walo ka buwang missing gi-salvage diay

CEBU, Philippines - Napalgan sa usa ka asawa alas- 9 sa buntag kagahapon ang dugay na niyang gipangita nga bana apan sa sulod na kini sa sako nga gilubong duol sa ilang balay ug kalabera na diha sa sitio Buot, barangay Punta Engaño, dakbayan sa Lapulapu.

Si PO1 Riel Palahang sa kapolisan sa Presinto 2 sa Lapulapu Police Station miila sa maong kalabera nga mao ang na-missing nga si Reyperson Grondiano, 32, kinsa positibong giila sa iyang asawa nga si Cristina.

Si Cristina mibutyag ngadto kang Palahang nga niadto pang bulan sa Mayo sa miaging tuig nawagtang ang iyang bana ug gihimo nila ang tanang pamaagi sa pagpangita apan napakyas sila, gituohan nila kaniadto nga milayas kini.

Ang pagkawagtang sa biktima gi-blotter sa Police Station 2 sa maong dakbayan.

Si SPO1 Allan Pantaleon sa Homicide Section nga nahinabi sa Banat News miingon nga sa imbestigasyon nga ilang gihimo ilang nasayran nga nakadawat og text message ang pamilya sa biktima nga nagpahibalong gipatay na kini.

Dugang pa sa text nga diha lang duol sa balay sa biktima kini gilubong hinungdan nga ilang gikawot ang dapit nga naa sa text ug diha nila makit-i ang usa ka sako nga ang sulod kalabera na.

Ang lugar nga gilubngan sa biktima gibanabanang 300 metros lang gikan sa ilang balay nga may lugar diin kini magtugwayan sa iyang mga kanding.

Ang maong kalabera gikatakdang ipa-awtopsiya pagsuta sa hinungdan sa kamatayon niini ug subayon pa si kinsa ang mipadala sa maong text nga gituohang may kasayuran sa pagpatay sa biktima walo na ka bulan ang nakalabay. (BANATNEWS)