CEBU, Philippines - Naluwas human sa tulo ka oras ang tulo ka mga tawo nga sakay sa ilang pumpboat nga nalunod dihang gikusokuso sa dagkong bawod inubanan sa kusog nga hangin sa miaging hapon diha sa kadagatan sa lungsod sa Tabogon.
Si PO2 Junrey Frias sa Tabogon Police Station nga nahinabi sa Banat News kagahapon sa hapon miila sa tulo mao sila si Maximo Saladaga, 49, Jerry Monares, 34, pulos nagpuyo sa barangay Camoboboan, Tabogon ug Shojie Viscayno, 35, taga dakbayan sa Danao.
Matud ni Frias nga sakay sa pumpboat nga nag-island-hopping ang tulo gikan sa isla sa kapitan Cillo sa kadagatan sa Tabogon apan sa ilang pagbalik pasado alas- 2 sa hapon kalit silang nakasugat og kusog nga hangin ug gikusokuso sila sa dagkong bawod hinungdan nga natikyaob ang ilang gisakyang pumpboat.
Ang tulo nanungtong sa kasko nga nagpadala sa sulog hangtud nga napadpad sila sa barangay Daan, Tabogon diin usa ka Wilma Inzo nga empleyado sa Sea Turtle Lagoon sa maong barangay ang nakakita kanila ug nanawag sa kapulisan.
“Alas- 5 na sa hapon na namo na-rescue kay sige mi og follow-up nila pero didto raman diay sila gidagsa sa Daan Tabogon, naluwas gyud namo ang tulo,” asoy pa ni Frias sa Banat News. (BANATNEWS)