Santo Papa nag-ampo sa taga Mindanao
CEBU, Philippines - Giapil ni Pope Benedict XVI sa iyang prayer intention alang sa pagsugat sa tuig 2012 ang liboang mga Filipino nga nabiktima sa kalamidad.
Ang Vatican Information Service (VIS) mipagawas og opisyal nga pamahayag diin nalakip niini ang general prayer intention sa Santo Papa alang sa Pilipinas labi na ang mga nawad-an og mga mahal sa kinabuhi sa Southern Mindanao nga maoy grabeng naapektohan sa miaging bagyong ‘Sendong.’
“They may receive spiritual and material comfort they need to rebuild their lives,” tipik sa pag-ampo sa Santo Papa alang sa biktima sa bagyo.
Ang Cagayan de Oro ug Iligan City mao ang nagrabehan kaayong naigo sa flashfloods diin miabot na sa kapin usa ka libo ang namatay samtang daghan pa ang missing.
Gawas sa mga kinabuhing nakalas naglisod usab karon ang mga survivors pagbarog og balik tungod kay gibanlas ang ilang kabtangan ngadto sa dagat. Gibanabanang moabot sa dul-an 100,000 ang apektado ug ang kinabag-an niini anha nagpuyo sa mga evacuation centers.
Ang gobiyerno ug ang United Nations mipadala na og hinabang kanila lakip na ang mga pribadong sektor nga walay puas sa pagpadala sa ilang mga hinabang.
Kagahapong adlawa gipagawas sa National Disaster Risk Reduction and Management Council (NDRRMC) ang opisyal nga lista sa mga namatay nga miabot na sa 1,257 ug laing 85 nga missing agi sa bagyong Sendong.
Lakip sa unang mihatag og tabang mao ang simbahan nga gipangulohan sa Catholic Bishop Conference of the Philippines (CBCO) diin presidente si Cebu Archbishop Jose Palma kinsa dali ra usab nga mipadangat sa iyang pag-ampo dungan sa pag-agni sa mga katoliko nga magtinabangay.
Sa laing bahin, si Cagayan de Oro Archbishop Antonio Ledesma mibukas usab sa mga Parish Church didto sa ilang lugar aron madugangan ang mga temporary shelters alang sa mga biktima sa bagyo ilabi na sa pagsugat sa Bag-ong Tuig. (Lemuel Maglinte/EIM) (BANAT)
- Latest
- Trending
