Scalpers sa tiket sa barko misiaw

CEBU, Philippines -  Ang Philippine Coast Guard (PCG) mipasidaan nga gukdon ang mga shipping companies kung masakpang dunay nahimong kalapasan sa official manifest sa ilang mga pasahero.

Kini gumikan sa giingong paglihok sa mga “scalpers” o mamakyaway og ticket diha sa mga barko nga ilang ibaligya ngadto sa mga pasahero ilabi na panahon sa peak season.

Usa sa mga kabanay sa usa ka pasaherong kinahanglang makauli kagabii diha sa Bato, Leyte, ang midangop sa Banat News ug mireklamo kabahin sa maong modus tungod sa napalit niining tiket gawas na sa ticketing office sa usa ka shipping company nga magbiyahian sa Cebu-Bato-Leyte.

Matud pa nga ang gisugo sa pagpalit sa tiket miadto sa ticketing office sa maong shipping company apan giingong nahutdan na sila og tiket kay adunay mipakyaw.

Tungod sa tinguhang makauli dayon ang pag-umangkon napugos siya pagpalit og tiket sa gilinyahan sa mga tawong wala sad makapalit og tiket diha sa gawas nga ang namaligya nagbarog ra.

Apan nakapahibulong kanila nga wala hatagi og discount ang pag-umangkon niini bisan paman nagdala kini og lehitimong school ID.

Dugang nakapakugang kanila mao nga ang ticket nga ilang napalit aduna nay pangalan. Ang ubang mga pasahero nga nakapalit niini wala nalang magpangutana tungod kay gusto gyud nilang makauli ug lisod nang makasakay pa.

 Sumala pa nga ang lalaking namaligya og tiket mitambag kanila nga kung adunay mositar kanila diha sa barko angkunon nalang nga iya kadto sa pag-umangkon nga wala na modayon, kung mahimo adto nalang pailisan ang pangalan sa manipesto na sa barko.

Si Anelito Gabison, Deputy Commander sa PCG Central-Eastern Visayas mibutyag nga duna silay nadawat nga report kabahin sa mga scalpers sa pantalan.

Apan miangkon siyang wala silay mahimo niini tungod kay ang ilang trabaho mao lang ang kaluwasan sa mga pasahero.

Mipasidaan hinuon siya sa mga pasahero nga dili mopalit og ticket gikan sa mga scalpers tungod kay kung ugaling dunay mahitabong aksidente dili makareklamo ngadto sa shipping company ang pasahero tungod kay wala ang ilang pangalan sa official manifest.

Si Gabisan mibahad nga kung duna silay masakpang susama niini gukdon nila ang mga shipping company nga maoy namaligya sa tiket.

Si PO3 Crizalde Verdijo, imbestigador sa Maritime Police nga maoy adunay hurisdiksyon sa scalpers mipasalig nga susihon nila ang report, apan kini miingon nga makahilabot lang sila niini kung sa sulod sa pantalan gibaligya ang mga tiket sa scalpers.

Giangkon sad niyang maglisod sila og pasaka og kaso kung walay mga ebidensiya ug wala say balaod batok sa mga scalpers apan sagad gyud sa moreklamo mao ang mga shipping companies kinsa walay kalibutan kabahin sa mga modus sa scalper. Sumala pa ni Verdijo ang kataposang reklamo nga ilang nadawat sa Maritime Police batok sa scalpers niadto pang tuig 1993.

“Lisod kaayo ang sitwasyon ug kulang ang mga ebidensiya in the middle of the case usahay dili na mo-cooperate ang shipping companies,” ni Verdijo pa.

Matud ni Verdijo nga ang maong sistema malikayan kung ang mga shipping companies estrikto sa ilang pag-isyu og mga ticket ngadto sa mga pasahero.

Midugang si Verdijo nga kasagarang puntaryahon sa mga scalpers kadtong mga shipping company nga dili estrikto sa pag-isyu og mga ticket. (BANATNEWS)