CEBU, Philippines - Dugang kaso ang gipasaka batok kang kanhi presidente ug karon Kongresista Gloria Macapagal Arroyo kini may labot sa kontrobersyal nga broadband deal nga giingong naglambigit sa mga dagkong kickbacks.
Kahinumdoman nga miulbo ang issue sa ZTE Corp.sa China tali sa transaksyon niini sa gobiyerno sa Pilipinas niadtong 2008 nga gisaway og maayo sa publiko hinungdan nga gikanselar kini.
Ang mga transaksyon naglambigit sa $330 milyones nga ang tuyo unta mao ang pagbutang og nationwide broadband network. Ang maong alegasyon kabahin sa kickbacks kusganong gihimakak ni Arroyo.
Ang maong mga kaso kabahin sa gisaad ni Presidente Benigno Aquino III nga gukdon ug lutoson sa hukmanan ang gihulagway nga high-level corruption nga maoy nagpasulabi sa Pilipinas.
Si Aquino mibasol kang Arroyo nga maoy nagpasiugda sa kurapsyon dinhi sa nasud nga nakaingon pagkawagtang sa pagsalig sa publiko diha sa gobiyerno ug ang pag-atras sa mga langyaw’ng negosyante dinhi sa nasud.
Apan si Arroyo mihulagway sa gibuhat kaniya sa kasamtangang administrasyon nga migamit og mga “black propaganda” aron dauton ang iyang pangalan.
Gawas kang Arroyo lakip sa gipasakaan og kaso mao ang bana niining si Jose Miguel "Mike" Arroyo, kanhi Elections Commissioner Benjamin Abalos ug kanhi Transportation Secretary Leandro Mendoza sa maong transaksyon.
Sumala pa sa Associated Press, ang tigpamaba sa korte nga si Renato Bocar gipasakaan og kaso si Arroyo tungod sa: “for being interested for personal gain in the approval of the ... project despite knowledge of the irregularities and anomalies that attended its approval.”
Ang reklamo gibase sa testimonya niadtong 2008 sa ZTE consultant nga si Dante Madriaga, nga matud pa niini ang orihinal nga kasabotan $130 milyones ang presyo apan miburot kini og maayo aron lang maapil ang mga kickbacks.( /EIM) (BANATNEWS)