100 ka balay naugdaw sa sunog

CEBU, Philippines - Usa ka tawo ang angol samtang mikapin sa usa ka milyon ka pesos   ang kantidad sa 100 ka balay nga    naugdaw atol sa sunog nga miigo sa sitio Silangan Uno ug Silangan Dos sa barangay Tinago siyudad sa Sugbo kagahapon sa kaadlawon ug sa lungsod sa Dalaguete sa miaging Lunes sa gabii.

Ang naangol mao si Olen Silva, hingkod, taga Silangan Uno.

Usa sa 98 ka balay sa dakbayan sa Sugbo nga naugdaw gipanag-iya ni Nene Silva, inahan ni Olen, samtang ang duha ka balay nga naugdaw didto sa sitio Lalin, barangay Poblacion lungsod sa Dalaguete gipanag-iya nila ni konsehal Sedney Belcina sa Dalaguete ug sa iyang silingan nga si Paquita Bejarasco, hingkod ug minyo.

Gibanabana sa kabomberohan nga mikabat og P76 mil ang kantidad sa 98 ka balay ug kabtangan nga naugdaw sa sunog sa Tinago, samtang P1 million usab ang kantidad sa duha ka balay didto sa Dalaguete.

Nadawat sa kabomberohan sa dakbayan sa Sugbo ang alarma sa sunog sa alas 2:49 sa kaadlawon ug nakontrolar sa kabomberohan ang kayo human sa 12 minutos.

Samtang ang alarma sa sunog sa Dalaguete nadawat sa kabomberohan sa maong lungsod sa alas 6:57 sa kagabhion ug nakontrolar ang kayo human sa 20 minutos.

Sumala sa mga bombero sa dakbayan sa Sugbo nagsugod ang sunog sa unang andana sa balay ni Silva gumikan sa mi-overheat nga Christmas lights.

Samtang ang sa Dalaguete naggikan ang sunog sa ikaduhang andana sa balay ni Belcina gumikan sa miulbo nga chargeable battery sa flashlight.

Wala na makatapon sa laing mga balay ang sunog gikan sa balay ni Belcina gawas sa kang Bejaresco tungod kay nadali pagpawong sa mga bombero sa lungsod.

Samtang ang sa Tinago gipaubos sa second alarm ang maong sunog ug ang   mga kabomberohan nga dali kaayong miabot sa nasunogan mao   ang gikan sa dakbayan sa Talisay, Chinese Volunteer Brigade ug Emergency Rescue Unit Foundation kinsa miabag sa mga kabomberohan sa Cebu City Fire Department pagsanta sa sunog.

Nasuta sa kabomberohan   nga nangatulog ang pamilyang Silva sa ikaduhang andana sa ilang balay dihang nakadungog sila og singgit sa ilang mga silingan bahin sa miulbong kayo sa ilang  silong.

Wala dayon makagawas ang pamilyang Silva tungod kay nagkayo na ang ilang silong busa nanglayat sila sa bintana ug ang katapusang miambak mao ang ilang anak nga si Olen kansang nawong ug abaga niini nasilab sa kayo.

Si Cebu City Fire Marshall Sr. Supt. Aderson Comar nagkanayon nga wala sila maglisod sa pagresponde sa sunog tungod kay adunay agianan ang mga firetruck apan tungod kay nagsikit-sikit ang mga balay nga pulos ginama sa gaan nga mga dapat hinungdan nga dali kaayong naabo ang 98 ka balay.

Si Domingo Lopez, kapitan sa maong lugar nagkanayon nga nag-agad pa sila sa tabang sa Department of Social Welfare Services (DSWS) sanglit wala pa silay mga tolda kagahapon sa buntag nga kapahuwayan sa mga biktima sa maong katalagman.

Mikabat usab sa 404 ka tawo ug 68 ka pamilya ang apektado sa maong sunog.

Matud ni Lopez nga ilang gamiton ang ilang calamity fund sa barangay aron ikapalit sa mga panginahanglanon sa mga biktima.Hinuon midugang si Lopez nga misaad na ang City Hall nga mohinabang og mga materyales sa balay aron ikapatukod dayon og mga balay sa mga nasunogan.

Ang mga nasunogan anaa karun gipahiluna sa duha ka kapilya   sa Silingan Uno ug Dos.(/WC)(BANAT NEWS)