Kawani sa Danao city hall gipatay sa kauban

CEBU, Philippines - Patay ang usa ka kawani sa Danao City Hall human gipusil sa iyang kaubang trabahante sulod sa ilang buhatan gibanabanang 500 metros lamang nga gilay-on gikan sa presinto sa kapolisan alas-5 pasado ang takna sa hapon niadtong miaging adlaw.

Ang biktima mao si Jovyner Batulan, 37, nga nagpuyo sa dalan Bonifacio sa barangay Poblacion sa maong dakbayan ug ang nagpusil mao si Jerlim Miro, 37, taga sitio Tabok sa barangay sa maong dakbayan. Si SPO3 Ildefonso Prosia sa kapolisan sa maong dakbayan nga nahinabi sa Banat News miingon nga diha sa sulod sa ilang buhatan sa Danao Fish Port ang biktima isip kolektor og ticket dihang gisulod sa suspek ug gipusil makadaghang higayon.

Ang biktima nakaangkon og daghang samad pinusilan sa ulo, lawas ug buko-buko, ang suspek daling mibiya sa lugar samtang gidala sa Danao District Hospital.

Apan matud pa ni Prosia gibalhin kini sa pribadong tambalanan sa dakbayan sa Sugbo ug pipila ka oras ang milabay nakabsan kini sa kinabuhi. Nadakpan hinuon ang suspek sa hot pursuit operation sa mga polis diha sa ilang balay ug kini mitug-an nga nasuko kini sa biktima tungod sa pagreklamo sa biktima batok kaniya nga langayan siyang moabot sa trabaho.(/EIM) (BANATNEWS)