CEBU, Philippines - Gumikan lang sa pakiglalis sa iyang igsuon, naputong ang 19 anyos nga dalaga ug naghikog sulod sa ilang balay sa sitio Pajo, barangay Poblacion, lungsod sa Tabuelan sa miaging buntag.
Ang napalgang wala nay kinabuhi kansang liog gihiktan og pisi kansang pikas tumoy gigaid sa kisame sa ilang balay mao si Ecil Good, 19, dalaga, ug molupyo sa maong lugar.
Sa pakighinabi sa Banat News ni PO3 Junard Luyao sa Tabuelan Police Station, kini mibutyag nga sa wala pa si Good maghikog, nagkalalis kini og ang iyang manghud nga si Lilibeth sa wala pa masayring hinungdan.
Unya giingong misalmot usab sa maong lalis ang ilang inahan nga si Betty, sumala pa ni P03 Luyao.
Midugang si PO3 Luyao nga pipila ka oras ang milabay, si Analyn Arnado nga silingan sa pamilyang Good, nagtimba og tubig duol sa balay sa maong pamilya ug maoy nakapasiplat kang Ecil nga nagbitay na sa ilang kisame.
Tungod niini dali siyang nagpakitabang sa mga silingan ug gihubad dayon ang pisi nga gihikot sa liog ni Good .
Gihatod kini sa mga kabanay ngadto sa Tabuelan District Hospital apan gideklarar kini nga dead on arrival. Ang kapolisan misusi pa karon sa tinuoray nga hinungdan sa paghikog sa dalaga.(/WC)(BANAT NEWS)