'Tigbas' sa mga taksi atol sa Nob. 1 ug 2 gisusi
CEBU, Philippines - Naghitak ang overcharging kon ‘tigbas’ sa mga taxi units dinhi sa dakbayan sa Sugbo nga namiktima og mga pasaherong namauli sa ilang tagsa-tagsa ka lugar atol sa nilabay’ng Kalag kalag. Mao kini nag-unang problema nga nasugatan sa Land Transportation Franchising and Regulatory Board (LTFRB-7) atol sa gihimong assessment niini human sa Kalag-kalag.
Giangkon ni LTFRB-7 director Ahmed Cuizon dihang nahinabi sa Banat News nga wala sila makabantay niini tungod kay busy kaayo sila pag-monitor sa mga bus pasaheroan diha sa South ug North Bus Terminals.
Giawhag ni Cuizon ang publiko pagkooperar pinaagi sa pagsumbong sa ilang buhatan ilabi na niadtong nabiktima sa ‘overcharging’ sa mga taksi pinaagi sa paghatag sa body number o plate numbers sa taxi nga ilang nasakyan nga mibiktima nila.
Gitumbok ni Cuizon mahulagway nga pagpamugos ang pakyaw nga sistema sa mga taksi sa mga pasahero ilabi na kadtong gikan sa pantalan padulong sa mga terminal tungod sa panginahanglang makasakay.
Gipasalig sa director nga imbestigahon ug pahamtangan og tukmang silot sama sa pagpabayad og multa o ba kaha pagsuspenso sa lisensiya ang mga drayber nga mapamatud-ang sad-an.
Gihulagway hinuon ni Cuizon nga malinawon ug malampuson sa kinatibuk-an ang pagpatuman nila sa Ligtas Undas campaign sa LTFRB-7, Land Transportation Office (LTO)-7.
Aduna say nadakpang mga bus pasaheroan ug jeepneys nga nakahimo og ginagmay’ng kalapasan sama sa pagbiyahe gawas sa ilang rota nga way special permit, trip cutting, duha ang expired ang prangkisa ug 15 ang nadakpan kay wala makadala sa Certificate of Public Convenience (CPC). (BANATNEWS)
- Latest
- Trending
