Budget di ikatakli sa laing gastohanan

CEBU, Philippines - Dili mahimo nga ang budget sa gobyerno alang sa usa ka proyekto adto mapunta sa laing matang sa gastohanan.

Kini maoy gibutyag ni Marie Nillama, ang public information officer sa Department of Public Works and Highways (DPWH) -7 kalabot sa sugyot   ni Sylvan Jakosalem, hepe sa Cebu City Integrated Traffic Operations Management kinsa miingon nga mas maayo nga ang budget sa giplanong tukoron nga mga flyover sa MJ Cuenco   Avenue ug sa Gorordo Avenue adto itapak sa gastoonon alang sa drainage system.

Sumala pa ni Nillama nga kung ang gobyerno migahin og budget alang sa flyover, sa maong klase nga proyekto ra gyud kini mapunta. Gipasabot hinuon niya nga mahimo ra nga mabalhin sa laing lugar ang proyekto basta ang maong kuwarta para ra gyud sa maong proyekto.

“Pananglitan,dili madayon ang flyover sa usa ka lugar, puwede raman ni nga ibalhin sa laing lugar, basta flyover ra gihapon ang himoon,” matud pa ni Nillama.

Sa pagkakaron   temporaryo una nga gipahunong ni Undersecretary for Regional Operations sa DPWH nga si Romeo Momo ang pagpanday na unta og flyover sa MJ Cuenco ug sa Gorordo gumikan sa yangungo   sa mga misupak niini nga gikan sa nagkadaiyang sektor sa publiko nga kinahanglang hatagan og solusyon.

Ang ulohang buhatan sa DPWH misaysay nga angayan una sulbaron ang mga butang nga maoy nakababag sa implementasyon sa maong proyekto ilabi na sa pagsupak sa pipila ka mga sektor sama kang Mayor Michael Rama .

Si Rama sa sayo pa una na nga mipadayag nga matud pa ang flyover nga tukoron makapasamot lang sa problema sa trapiko ning dakbayan.

Alang sa mayor nga mas labing gikinahanglan   ang road widening sa mga karsada dinhi   tungod kay mao kini ang epektibong solusyon sa nagkadaghang sakyanang de motor  niining siyudad karon.  - BANAT NEWS