Tulo nangaigo sa bala angol

CEBU, Philippines - Usa ka estudyante ug laing duha ka tawo ang nangaangol human kini maunay sa bala sa armas nga ilang giduwa-duwaan ug gipamusil usab sa nagkalainlaing lugar sa dakbayan sa Sugbo ug Lapulapu niadtong Domingo sa gabii.

Ang mga biktima  mao sila si Jerry Emit, 25, usa ka 4th year nga tinun-an sa Criminology, nga nagpuyo sa   Sanchez Compound sa barangay San Nicolas; Matias Lopez, 59, minyo nga taga Upper Manol, barangay Tisa; ug Richie Amodia Jepiso, 23, minyo nga taga sitio Kagudoy, barangay Basak, dakbayan sa Lapulapu.

Si Emit giingong nakig-inom kini sa iyang mga barkada, sumala sa iyang kapuyo nga si Celeste de Gracia, 22.

Dihang nangalasbag na nagduwa-duwa kini sa armas ug dihang mibuto ang maong hinagiban napisok sa usa ka bala ang tiyan sa biktima ug didto kini dad-a sa Chong Hua Hospital.

Samtang si Lopez nakig-inom usab sa iyang higala samtang nagduwa og tong-its dihang paglakaw niini gipusil sa wala hiilhing kriminal ug napisok sa usa ka bala ang iyang tingkoy.

Si Jepiso, naglingkod-lingkod sa ilang tugkaran dihang naagian siya sa kontra niyang nailhan lang nga Jiapo.

Matud pa sa kapolisan nga dihang nakita sa biktima nga milanit og armas de fuego ang suspek, kalit kining mihapa sa yuta busa imbis bagolbagol niya ang tumong, nagpasalamat siya nga bukton ra niya maoy nasabak.

Gihatod dayon ang biktima ngadto sa tambalanan, samtang gipangita pa sa kapolisan ang suspetsado.  (BANATNEWS)