Amahang Ponce ilubong karon

CEBU, Philippines - Ilubong na karong ala-una sa hapon si Emmanuel Ponce ang amahang giingong mi-masaker sa iyang pamilya, diha sa Queen City Garden sa dakbayan sa Sugbu samtang ang iyang asawa nga si Melinda ug tulo nila ka anak dad-on usab karong gabii paingon sa Sorsogon aron didto ilubong.

Kagahapon sa udto nagrosaryo ang mga kabanay sa pamilyang Ponce diha sa balay niini sa Palm View Village sa barangay Tabunok ug pagkahuman gibendisyonan ang balay ni Rev. Fr. Roy Cabradillo sa Mary’s Little Children Community.

Atol sa maong pag-ampo nagpunay og hilak ang 14-anyos nga bugtong naluwas sa maong linuog nga krimen samtang giduyogan sa iyang mga iyaan ug uyoan ug mga higala kagahapon.

Kagabii gikuha ang patay’ng lawas sa iyang amahan sa Saint Peters Funeral Homes ug gidala sa barangay Mabolo diin ang iyang mga kabanay anaa magpuyo sa maong lugar.

Gikatakdang mohatud sa lubong ang 14-anyos ug pagkagabii mokuyog siya sa paghatud na sa iyang inahan ug tulo ka igsuon sa Sorsogon.

Si Paul Redula, ig-agaw sa bata nagkanayon nga human sa lubong didto sa Sorsogon mobalik dinhi ang 14-anyos aron tiwason ang iyang pagtuon karung tuiga kay sa sunod tuig adto na siya moeskuyla sa Sorsogon.

Gipadayag usab niini nga mipadayag kanila si Embrelaince nga andam kining mopuyo sa ilang balay kun ugaling duna kini kauban.

Si Fr. Cabradillo nga nahinabi sa mga tigbalita nagkanayon nga ang balay sa pamilyang Ponce gitawag na og ‘house of deliverance’ tungod sa mga report nga dunay nagsuroy-suroy nga mga dautang espirito ug aron mawagtang kini gipabendisyonan kini sa mga kabanay.

Apan giklaro niyang dili tinuod nga dunay maglakaw-lakaw sulod sa balay sa pamilyang Ponce ug ang maayong buhaton mao ang pag-ampo.

Sumala pa ni Cabradillo nga naa pa sa stage of healing ang pamilyang Ponce kay dili sayon ang pag-recover sa maong hitabo.

Si Thelma Billones ang iyaan sa bata nagkanayon sa mga tigbalita nga nagtuo silang duna pay kalag sa sulod sa balay hinungdan nga ilaha kining gipabendisyonan. (BANATNEWS)