CEBU, Philippines - Duha ka tinun-an nga naglakaw taliwala sa kusog nga uwan gitulis sa upat ka mga armadong lalaki nga wala hiilhi sa dalan B/M. Dimataga sa barangay Poblacion, dakbayan sa Lapulapu sa miaging gabii.
Ang mga biktima mao sila si Rene Masong, 18, taga Sacs 2 sa barangay Mactan sa maong dakbayan ug Agelica Aro, 19, taga barangay Catarman sa lungsod sa Cordova. Ang duha pulos mga tinun-an sa Cebu Technological University (CTU) sa dakbayan sa Sugbo.
Si PO2 Gilbert Areglo sa kapolisan sa Presinto 3 sa maong dakbayan nga nahinabi sa Banat News miingon nga mao pay pagkanaog sa gisakyang PUJ sa mga biktima gikan sa dakbayan sa Sugbo ug naglakaw kini aron mag-atang na usab og sakyanan pauli sa ilang tagsa-tagsa ka pinuy-anan.
Dihang pag-abot nila sa ngitngit nga bahin sa maong lugar ilang nasugatan ang upat ka mga batan-ong lalaki nga nangaligo sa ulan ug ang usa niini miibot og kutsilyo dayon gition kanila uban sa pagdeklarar nga tulis.
Gumikan sa kabalaka nga panunggabon sila, naahat ang mga biktima sa pagtunol sa ilang cellphone, salapi, alahas ug uban pa.
Matud pa ni PO2 Areglo nga human makuha ang mga butang sa mga biktima dali kaayong nakasibat ang mga tulisan. Padayon pang gipangita sa mga kapolisan ang maong mga tulisan. - BANAT NEWS