CEBU, Philippines - Gikatakda nang tak-opan ang karaang merkado publiko karong bulan sa Nobiyembre niining tuiga ug buksan na sa publiko ang bag-ong merkado publiko sa luyo sa Sports and Cultural Complex sa sitio Tribunal sa barangay Centro sa dakbayan sa Mandaue.
Si Mandaue City Administrator James Abadia miingon nga karong sunod semana sugdan nila pagpahibalo ang mga vendors sa karaang merkado nga mahimo na silang mo-apply aron makakuha’g pwesto sa bag-ong merkado.
Ang mga naninda sa karaang merkado nga diniyos kun mamayad sa buhis maoy prayoridad nga makakuha og pwesto samtang ang mga gahi mamayad sa ilang obligasyon paesplikaron una.
Matud pa ni Abadia ilaha karong gituki ang gipangayo sa mga vendors nga pakunhoran ang abang sa stalls sa bag-ong merkado ug paghatag og tax holiday nga molungtad og duha ka bulan nga magsugod sa Nobyimbre hangtud sa Disyembre niining tuiga.
Si Abadia miingon nga sa adlaw sa pagbalhin sa mga manindahay magsugod na usab sa pagdagan ang upat ka mga electronic cars alang sa libreng pagsakay sa mga pumapalit sa bag-ong merkado. Giplano na usab nila ang paghatag og kahigayonan sa mga traysikol nga makasulod sa maong lugar. (BANATNEWS)