Security agency may lapso?

CEBU, Philippines - Gisusi karon sa Firearms and Explosives Security Agencies Guards & Supervisory Section (FESAGSS) kung dunay tulobagon ang duha ka security agencies sa nahitabong pagpanulis sa armored van diha sulod sa Robinsons Department Store niadtong Lunes.

Nakaduso na og Incident Report (IR) ang Puritan Security Agency sa FESAGSS ug bugtong ang Lanting Security Agency nga maoy security provider sa maong tindahan ang wala pa makahatag sa maong report. Si Supt. Rex Derilo, direktor sa FESAGSS-7 nga nahinabi sa mga tigbalita nagkanayon nga kinahanglang may eksplinasyon ang maong mga security agencies aron pagtino si kinsa ang manubag sa lapso niadtong tungora.

Ang pagpanulis miresulta sa kamatayon sa lima ka tawo, duha kanila mga gwardiya ug tulo ang tulisan samtang upat ang nangaangol lakip ang duha ka polis nga miresponde.

Ang FESAGGS motutok sa security agency nga nagbantay sa maong department store tungod kay nalutsan sila sa duha ka mga armadong tulisan nga nagdala og armas paingon sa sulod sa foodcourt ug giingong nangaon pang daan samtang nagpaabot sa ilang target.

Matud ni Derilo nga kun giseryoso sa mga gwardiya ang paghigpit sa seguridad diha palang sa entrance dili makalusot ang maong mga armadong tawo.

Ang duha ka tulisan mipusil sa teller nga si Lewin Sorig ug gwardyang si Lito Odag ug gikuha ang bag.

Sumala pang Derilo nga kung silang mga polis dili gyud makasulod nga armado sa malls kung dili ibilin sa gwardiya ang armas nganong nakasulod man ang maong mga tulisan.

Gisusi usab ni Derilo kung may koordinasyon ba ang mga gwardiya sa mall ug ang mangabot nga security escorts sa armored van nianang mga orasa.

Gipasabot ni Derilo dili gyud unta angayang manaog dayun sa armored van ang gwardya sa teller kun dili ma-secure ang palibot sa mga gwardya sa department store.

Matud ni Derilo adunay tulobagon nga administratiba ang security agency sa maong department store. (BANAT NEWS)