MCPO ug LLCPO naghigpit sa seguridad

CEBU, Philippines - Nunot sa nahitabong tulis sa dakbayan sa Sugbu naghigpit na usab sa ilang seguridad ang nagkadaiyang siyudad ug kalungsoran partikular na ang kapolisan sa dakbayan sa Mandaue.

Matud pa ni Mandaue City Police Office director Sr. Supt. Noel Gillamac mas gipakusgan nila karon ang police visibility ilabi na sa mga dapit sa mga bangko, money changers ug uban pang mga financial institution.

Sa matag gabii ang mga patrol cars sa MCPO ug sa unom niini ka presinto sa kapolisan gitahasan usab sa pagpatrolya.

Apan dako og ikatampo ang impormasyon nga ikahatag sa komunidad sa panahon nga adunay mga insidente ug mga kadudahang tawo.

Si Gillamac miklarong dili mga ‘superman’ ang mga polis nga daling makakuha’g kasayuran kun may dautang elemento sa usa ka lugar.

“We don’t posses super human abilities that is why we are soliciting the help of community,” dugang pa ni Gillamac.

Samtang si Sr. Supt. Anthony Obenza, director sa Lapulapu Police Station mao gihapon ang panawagan sa ilang hurisdiksyon tungod kay alang kaniya mas dali ang aksyon sa kapolisan kun may impormasyon gikan sa komunidad. (BANAT NEWS)