Security agency imbestigahon

CEBU, Philippines - Mag-atubang og imbestigasyon ang Puritan Security Agency, ang ahensya sa duha ka guwardiyang napatay atol sa tulis niadtong Lunes ingon man ang security agency sa mga security guard sa Robinson Department store.

Si Supt. Rex Derilo, hepe sa Firearms and Explosives Security Agency Supervisory Section (Fisagss) nga nahinabi sa mga tigbalita nagtuo nga adunay lapso ang guwardiya nga nag-escort sa teller sa China Bank nga misulod sa foodcourt sa maong tindahan aron pag deliver sa kuwarta sa ilang kliyente sa maong higayon

Matud ni Derilo nga kinahanglang duha gyud unta ka guwardiya ang mo-escort sa teller niadtong higayona samtang ang kauban niini maoy magbantay sa armored van.

Gawas niini, nagkanayon si Derilo nga kinahanglan gyud unta nga i-secure ang area sa mga guwardiya sa department store niadtong higayona ug kanunay kining alerto sa ilang pagbantay hangtud nga dili mobalik ang teller ug ang escort nga guwardya gikan sa paghatud niini sa kuwarta sa ilang kliyente sulod sa maong department store.

Gawas niini kinahanglan gyud unta nga rikisahon og tarong sa mga guwardya sa maong department store ang mga tawo nga mosulod sanglit kunohay sila estrikto sa ubang tarong tawo apan nganong nalutsan man sila sa duha ka tulisan nga misulod sa food court sa maong tindahan niadtong higayona kinsa pulos nagluklok og mga hinagiban.

Siya midugang nga ang resulta sa iyang imbistigasyon sa duha ka mga security agency   iyang ipadala ngadto sa ulohan nilang buhatan uban sa rekomendasyon kun unsa may ipahamtang silot sa nahisgotang mga ahensya.

Posibling makanselar ang lisensya sa mga guwardya sa department store ingon man ang security agency kun masuta nga adunay lapso sa seguridad atol sa tulis nga nahitabo niadtong Lunes, matud pa ni Derilo.  - BANAT NEWS