Sakyanan sa gobiyerno di padaganon

CEBU, Philippines - Si Mayor Teresito Mariñas sa lungsod sa Barili mipagawas dayon og kamanduan nga dili una padaganon ang tanang mga sakyanan nga gipanag-iya sa kagamahanan sa lungsod sa iyang lungsod.

Kini human nawad-i og preno ang trak de karga sa munisipyo nga gigamit ug gipasakyan sa kaping 60 ka tawo nga mihatud og lubong apan nadisgrasya didto sa barangay Balao   nga misangpot sa kamatayon sa 12 ka tawo ug nakapaangol og laing 50 pa ka tawo niadtong Huwebes.

Sumala ni Mayor Mariñas nga ang tanang mga sakyanan sa lungsod sa Barili ipaubos una sa road worthiness test   aron sa pagsiguro nga dili na masubli ang maong hitabo.

Samtang gitataw ni Mayor Mariñas nga dili   mapanubagan   sa lungsod ang   tanang galastohan alang sa mga nabiktima gumikan sa kakuwang og pundo sa panudlanan niini.

Matud pa ni Mayor Mariñas nga mangayo siya og tabang kang Governor Gwendolyn Garcia ug kang 3rd district Congressman Pablo John Garcia. Kini aron mahatagan og hinabang financial ang mga nabiktima ilabina sa mga pamilya sa nangamatay sa maong digrasya.(WC)  (BANATNEWS)