CEBU, Philippines - Patay ang usa ka kawani sa Metaphil nga nagbase sa barangay Buanoy lungsod sa Balamban human aksidenteng napusdakan sa crane nga mihagtos samtang nagtrabaho niadtong Miyerkules sa alas 3:00 sa hapon.
Patay nang nadangat sa tambalanan mao si Rodrigo Johnrey Doble, 23, helper sa modular office sa Metaphil nga nagbase sa maong lugar ug lumad nga taga Bais City, Negros Oriental apan kasamtangang nagpuyo sa barangay Abucayan, Balamban.
Matud ni PO2 Cesar Climaco sa Balamban Police dihang nahinabi sa Banat News miingon nga adunay gi–grind si Doble sulod sa buhatan dihang aksidenteng mihagtos ang crane nga gituohang ni overheat og napusdakan kini.
Maayong pagkalumping sa dughan ug tiyan niini ug gitabang dayon sa company nurse nga si Cypria Mae Borreros apan wala nay panimuot hinungdan nga gidali pagdala sa Balamban District Hospital diin kini gideklarar sa mga doktor nga dead on arrival.
Ang kapulisan padayon pa sa ilang imbestigasyon kun si kinsay manubag sa maong aksidente.(EIM) (BANATNEWS)