CEBU, Philippines - Duha ka sakop sa Alpha Kappa Rho fraternity nga nangulata og duha ka minor de edad nga mga tinun-an sa highway sa dakbayan sa Mandaue sa miaging hapon ang nadakpan sa kapolisan.
Ang duha nga nakuhaan og armas nga kalibre .22 uban sa upat ka buhing bala ug upat usab ka stick sa marijuana giilang si Rolando Cortes, 21, taga barangay Tipolo sa maong dakbayan ug ang 15-anyos nga tinun-an sa Subangdaku National High School .
Si SPO1 Emmanuel Enople sa kapolisan sa Presinto 2 sa barangay Subangdaku sa maong dakbayan mibutyag nga gikulata sa duha ang duha ka 15-anyos nga tinun-an sa Saint Paul College Foundation sa dalan M.C. Briones sa maong dakbayan.
Matud pa ni Enople padulong na pauli ang duha dihang gisugat sa mga suspetsado ug gikulata apan adunay mga nakakita ug daling misumbong sa kapolisan.
Ang mga biktima pulos nabun-og ug gidala sa Mandaue City District Hospital . Sumala pa sa report ang duha maoy manghingiay sa mga tinun-an sa maong dapit. (BANATNEWS)