CEBU, Philippines - Gisugyot sa city legal office sa Mandaue ngadto kang Mayor Jonas Cortes nga hunongan na ang pagkuha nila sa serbisyo sa Jadewell Parking System Corporation nga maoy gitahasan sa kagamhanan sa maong dakbayan sa pagdakop ug pagpahamtang og multa sa magpataka og parking sa daplin sa kadalanan. Si Atty. Jamaal James Calipayan nga maoy assistant city legal officer sa press conference nga gipahigayon niadtong Miyerkules miingon nga wala motuman sa ilang kasabutan ang maong kompanya.
Kini sama sa kapakyas niini sa pagbutang og performance bond nga nagkantidad og P500,000 ug ang pagpamutang unta sa maong kompanya og electronics parking meters ug street parking management system.
Dugang nga mga kalapasan sa kasabutan mao ang kapakyas usab sa pagbaligya sa naguyod nga mga sakyanan nga gihipos diha sa impounding area maong wala makakolekta ang dakbayan.
Laing nakit-ang kakulian mao nga adunay mga establisamento sa dakbayan nga nagbayad og P600 sa matag bulan alang sa ilang gi-parking nga sakyanan apan gibutang sa resibo P300 lang.
Ang gihimong pakisusi gimando ni Cortes gumikan sa mga nadawat niining reklamo batok sa maong towing services agency. - (BANAT NEWS)