Canadian gipatay sa sinagop

CEBU, Philippines - Nadakpan sa kapulisan ang magtiayon ug ilang 17-anyos nga anak lalaki nga maoy responsable sa pagpatay sa usa ka missionary nga Canadian national kansang patay’ng lawas gilubong ilawom sa alad sa baboy nga gipanag-iya sa suspek diha sa barangay Adlaon, bukirang lugar sa siyudad sa Sugbu.

Ang nadakpan mao si Rolando Valmoria Aburot ug iyang asawa nga si Marilyn uban sa ilang 17-anyos nga lalaki.

Si Rolando mikumpisal sa kapulisan nga siya maoy nipatay sa biktimang si Darcy Hanz Reutenberg, 53, kasamtangang nagpuyo sa barangay Pagsabungan siyudad sa Mandaue.

Si Rolando, 46, kanhi mangulingay misurender sa armas nga iyang gigamit sa pagpusil diha sa ulo sa biktima niadtong Hunyo 25, sa miaging buwan ug nadiskobrehan ang patay’ng lawas niadto rang Huwebes sa hapon.

Ang laptop sa biktima narekober sa kapulisan gikan sa buyer niini diha sa downtown area human giprenda sa asawa ni Rolando og P8 mil.

“Nagkalalis mi niya kay wa ko bayri sa paghimo sa iyang resthouse,” tug-an pa ni Aburot maong iyahang napusilan ang langyaw atol sa ilang pag-inom.

Mipasangil kini nga inay mobayad ug mokuot sa iyang kwarta ang biktima mibunot hinuon kini og armas ug gihulga siya niini hinungdan nga iyang giilog ang armas ug sa dihang milampos siya pag-ilog iya dayon kining gipusil sa ulo.

Sa awtopsiya ni Dr. Joe Martin Fuentes, medico legal officer sa PNP Central Visayas, gidul-it sa ulo pagpusil ang biktima tungod sa gun powder burns diha sa samad sa ulo niini.

Kagahapon sa buntag ang mga sakop sa Homicide Section uban sa personnel gikan sa Cebu City Public Safety Management (CCPSM) kanhi Security and Service Group (SSG) nakarekober sa Frontier Revolver nga may bala sa Armalite nga gilubong ilawom sa abohan sa balay sa suspetsado.

Ang asawa sa suspek nga si Marilyn Gerenia Aburot mihimakak nga may kasayuran siya sa krimen sanglit sa miagi lang gabii mitug-an ang iyang bana uban sa ilang 17-anyos nga anak.

Nasayran sa kapulisan nga nahibulong ang mga silingan sa magtiayon nga nakapalit kini og hayopan nga kabaw, pito ka baktin ug daghan kini og kuwarta ug namusta og linibo sa tari sa manok si Aburot.

Ang biktima gi-report nga na-missing sa iyang landlady nga si Evelyn Rebuscit sa Basak Police Station sa Mandaue kay wala na kini makauli sukad niadtong Hunyo 25 sa buntag sakay sa iyang motorsiklo.

Ang mga silingan nga nasayod nga si Rolando ug ang biktima bag-ohay pa nilang nakit-ang naghimo sa resthouse sa biktima daling nagduda ug mitaho sa mga opisyal sa barangay ug midangop sa kapolisan.

Si SPO1 Jeodito Llena nga nadestino sa bukirang barangay pagkasayod nga na-missing ang biktima naniid sa kalihukan sa mga Aburot ug diha nila masayring wala na kini magpuyo sa ilang balay.

Niadtong Huwebes sa hapon, gipahibawo sila sa mga residente ug silingan sa magtiayon nga nakakita sila og dugo duol sa resthouse sa biktima hinungdan nga ila kining gisusi nga distansya lang og 300 metros gikan sa balay sa mga Aburot.

Diha nila usab mamatikdi ang bag-ong gisementong tangkal sa baboy ug tungod sa ilang pagduda ilaha kining gikawot ug ilang nadiskubrehan ang patay’ng lawas ni Reutenberg nga giputos og habol.

Si Kagawad Maria Elena Arejola maoy gipahibalo sa asawa sa suspek nga buot kining motahan ug kini ilang gikuha sa barangay Talamban niadtong Huwebes sa gabii.

Si Aburot walay lipud-lipod nga miangkon sa krimen ug iyang gikuha ang P50 mil sa biktima sa pitaka niini.

Matud sa mga silingan nga street children kaniadto si Aburot ug ang biktima maoy migastos kaniya hangtud nga naminyo ug mao pay migasto ang biktima sa iyang kasal.(EIM) (BANAT NEWS)