CEBU, Philippines - Kasong paglapas sa Republic Act 9165 kon Comprehensive Dangerous Drugs Act of 2002 ang isang-at karong adlawa batok sa tawo nga nasakmitan og usa ka pakete nga shabu sa kapolisan sa dakbayan sa Mandaue sa miaging gabii.
Ang gipasakaan sa maong kaso sa kapolisan sa Police Station 1 sa Mandaue City Police Office (MCPO) mao si Abdol Wahing Sultan, 22, lumad nga taga Mindanao ug temporaryong nagpuyo sa Zone 3, sa barangay Mantuyong, sa maong dakbayan.
Si Sultan nagtingkagol karon sa prisohan human siya masikop sa kapolisan nga naghupot og usa ka paketeng shabu didto sa merkado publiko sa maong dakbayan.
Si Inspector Mark Edward Barrius, PO3 Edmundo Villucora ug PO2 Bryan Beringger nga maoy nakasikop sa suspetsado nagkanayon nga ila kining nasigpatan nga kalit lang midagan dihang nakakita sa ilang patrol car nga maoy nakapaturok sa ilang pagduda kaniya.
Nanaog sila sa sakyanan ug ilang gigukod ang suspetsado ug dihang ilang naapsan ila kining girikisa diin didto sa bulsa niini ang usa ka paketeng shabu. (BANAT NEWS)