CEBU, Philippines - Mirekomendar ang konseho sa siyudad sa Sugbo ngadto sa City Treasurer’s Office nga kibrahan ang giduso nila nga budget proposal alang sa umaabot nga kalihukan sa siyudad sa Sugbo nga Tax Payers Night karong Hulyo 15.
Moabot ngadto sa P2.3 milyones ang gipangayong budget alang sa maong kalihukan nga tambongan sa 777 ka mga bisita.
Atol sa pagtuki kagahapon sa konseho, mihimo kini og committee report nga dili na kinahanglan nga mokuha pa og emcee ug voice over nga nagkantidad og P23,000 gumikan kay pwede ra kini nga mahimo sa mga empleyado sa City hall. Gipatangtang usab sa konseho ang pagkuha og pribadong dancers nga nagkantidad og P30,000 sanglit puwede raman nga mabuhat sa mga dancing collectors.
Samtang ang musical arrangement nga makagasto og P40,000 wala usab tuguti sa konseho. Gitambagan sa konseho si City Treasurer Ofelia Olivanga mohimo og bag-ong budget proposal ug iduso kini sa sunod semana.
Gitun-an na usab karon sa konseho ang ubang galastohonon sama sa lights ug sounds (P165,000) Stage construction (P65,000), scriptwriting ug stage management (120,00) ug ang pag-abang og costumes alang sa mga usher/ usherettes (40,000).
Naandan na sa siyudad sa Sugbo ang pagpahigayon og Taxpayers’s Night alang sa paghatag og mga pasidungog sa mga taxpayers ug ang maong kalihukan nasugdan sukad pa sa nangagi nga mga administrasyon. (BANAT NEWS)