Kaso ni anhing Sanches vs Gwen, kaubanan husayon
CEBU, Philippines - Sugdan karong hapon sa Department of Interior and Local Government ang husay sa reklamo ni anhing Bise-Gob. Gregorio Sanchez, Jr. batok ni Gob. Gwendolyn Garcia ug ubang opisyal sa Kapitolyo.
Ang husay ipahigayon alas-2 karong hapon sa rehiyonal nga buhatan sa DILG-7 ug molungtad pa kini sa Hunyo 9 subay sa gitakda ni Director III Jesus Doque IV.
Matud pa ni DILG-7 regional director Pedro Noval, Jr. nga wala siya masayod kung si kinsa ang molangkob sa grupo nga mohusay sa kaso apan siya segurado nga gikan kini sa legal service division sa labaw nilang buhatan.
Si Sanchez misang-at og reklamo sa buhatan sa DILG gumikan sa giingong pagpanghilabot ni Garcia sa kalihukan sa buhatan sa bise-gobernador sama sa pagtudlo sa mga empleyado ug ang pagtangtang sa ilang pundo ubos sa 2011 annual budget.
Sayo niini, ang anak ni Sanchez nga si Engr. Grecilda Zaballero mipadayag nga ang husay sa kaso maoy tipik sa ilang pagpahigayon sa ika-40 ka adlaw sa pagkamatay sa iyang amahan gawas sa Santos nga Misa sa lubnganan sa Mactan Memorial Garden.
Si Zaballero nagtuo nga ang pag-irog sa kaso resulta kini sa ilang panagsulti ni Presidente Benigno Aquino III atol sa pagduaw niini sa haya sa iyang amahan diin iyang gitunol ang mga dokumento may kalabutan sa maong kaso.
Kaubang gireklamo ni Sanchez mao sila si provincial legal officer Marino Martinquilla, provincial administrator Eduardo Habin, treasurer Roy Salubre, assistant treasurer Emmanuel Guial ug human resource management officer Noli Vincent Valencia. (BANAT NEWS)
- Latest
- Trending