Negosyante gipusil sud sa opisina

CEBU, Philippines - Gipusil ang usa ka negosyanteng Insik sa wala mailhing kriminal samtang ang biktima anaa sulod sa iyang opisina kagahapon sa alas 9:50 sa buntag diha sa dalan Don Mariano Cui sa barangay Capitol Site siyudad sa Sugbu.

Kini maoy giingong ikatulong higayon nga gisuwayan og kutlo ang kinabuhi sa biktimang si Kenneth Teo, 39, nagpuyo sa naasoy’ng lugar kinsa nagnegosyo og water refilling stations ug laundry dinhi sa dakbayan sa Sugbu.

Sa pasiunang imbestigasyon nila ni SPO4 Rey Cuyos, sa Homicide Section sa Cebu City Police Office (CCPO) dihay usa ka lalaking naniid sa kalihukan sa biktima ug mikaon sa atbang sa refilling station.

Ang maong lalaki kalit misulod sa refilling station ug nilahos sa opisina sa biktima ug gipusil sa makadaghang higayon ug naigo kaduha sa ibabaw’ng bahin sa dughan ug tapsing sa iyang liog.

Daling miikyas ang mamumuno samtang gidali paghatud sa Cebu Doctors Hospital si Teo ug giingong luwas na ang kahimtang sumala pa ni Cuyos.

Matud sa mga nakasaksi human sa hitabo miabot dayon ang usa ka motorsiklo ug misakay ang gunman.

Si Cuyos nga nahinabi sa Banat News nagkanayon nga nakakuha sila og usa ka slug ug mga tipaka sa bala diha sa crime scene.

Kini na maoy ikatulong higayon nga gipusil ang biktima sa wala mailhing kriminal. Unang gipusil si Teo niadtong bulan sa Nobiyembre sa miaging tuig diha sa Taboan ug gisundan usab pagka Disyembre 10 sa miaging tuig sa alas-7 gihapon sa buntag diha sa Taboan. (BANAT NEWS)