Dasmagan patay sa hit and run wa ilhi

CEBU, Philippines -  Nagpabiling wala hiilhi ug walay miduaw nga tagtungod   sa usa ka batan-ong nadasmagan patay sa usa ka hit and run nga motorsiklo didto sa barangay South Poblacion, dakbayan sa Naga  sa alas 4:00 sa kaadlawon niadtong Abril 29, 2011.

Si Delia Tibay, head officer sa Social Welfare and Development sa dakbayan sa Naga miawhag sa mga panimalay nga nawad-an og sakop sa pagsil-ing niining ginganlan lang nila og Mr X nga anaa karon hayaa sa Mt. View Funeral Home, sa barangay Inayagan, sa maong dakbayan.

Gibana-bana kining nagpanuigon og 15 ngadto sa 17 anyos, tabunon ug kulongon ang buhok ug regular ang gidak-on ug ang pamarog.

Ang mga nakasaksi sa hitabo mitug-an sa kapolisan nga naglakaw sa karsada ang biktima dihang may nagginukdanay nga mga lima ka motorsiklo ug ang   naulahi maoy nakadasmag sa biktima.

Misaliring ang biktima sa daplin sa karsada, samtang mipasirit og padagan sa iyang motorsiklo ang kriminal nga gibiyaan ang biktima.

Ang mga molupyo na sa maong lugar maoy nagdala sa biktima ngadto sa South General Hospital sa barangay Tuyan, sa maong dakbayan.

Apan wala na malibre sa mga doktor ang biktima ug nabugtoan kini sa kinabuhi nianang pagka-alas 7:00 sa buntag sa maong petsa.

Si Tibay mihangyo sa mga tagtungod nga nawad-an og anak o kaha sakop sa pamilya sa pagsil-ing sa patay’ng lawas ning biktima pamasin nga mailhan kini nila nga ilang kabanay.(WC) (BANAT NEWS)