CEBU, Philippines - Grabeng naangol ang usa ka taxi drayber nga gihapak ang ulo sa puloan sa armas sa tulo ka tulisan ug nakaingon sa paglayat niini gikan sa gimanehong taksi bisan nagdagan pa kini. Ang pagpanulis nahitabo diha sa sitio Laray, New Road, barangay Pitogo, lungsod sa Consolacion, alas- 2 pasado ang takna sa miaging kaadlawon.
Si PO2 Jonasque Romero nga nahinabi sa Banat News miila sa biktima nga mao si Rolando Duyag Ypil, 31, taga Purok Camote, barangay Paknaan, dakbayan sa Mandaue.
Matud pa ni Romero nga tulo ka wala hiilhing mga lalaki nga gibanabanang nagpangidaron og 15 ngadto sa 17- anyos ang iyang pasahero nga mipara diha sa dalan Plaridel sa barangay Cambaro ug mimando nga magpahatod sa barangay Pitogo sa lungsod sa Consolacion.
Apan pag-abot sa nahisgutang dapit usa sa mga batan-on ang kalit mition kaniya og armas ug mideklarar og tulis, dihang nagdumili paghatag sa iyang kwarta ang biktima gihapak kini sa ulo sa puan sa armas.
Tungod niini bisan nagdagan pa ang taksi giablihan niya ang pultahan ug milayat maong nabangga sa bomba sa tubig diha sa daplin sa dalan ang taksi.
Ang biktima daling nagpakitabang sa mga estambay sa maong lugar apan walay mitabang kaniya tungod kay nag-iyahay pud og dagan pahilayo sa maong lugar.
Ang tulo ka tulisan nga gituohang nakalitan usab sa hitabo naglumbaanay og gawas ug nag-iyahay og panagan. Ang biktima gidala sa tambalanan sa nahisgutang lungsod ug gibalhin sa Vicente Sotto Memorial Medical Center sa dakbayan sa Sugbu.
Samtang ang mga tulisan padayon pang gipangita sa kapolisan nga ilang gituohang mga molupyo ra usab sa maong lugar. (BANAT NEWS)