CEBU, Philippines - Usa ka bayong-bayong nga nangarnap og motorsiklo nadakpan sa barangay tanod didto sa sitio Katugasan, barangay Casili, lungsod sa Consolacion, sa miaging adlaw.
Ang ngalan sa suspetsado nga 13 anyos pa gipugngan, samtang ang biktima nga tag-iya sa motorsiklo mao si Danilo Bihag, nga taga Casili.
Matud pa ni PO3 Allen Garciano sa Consolacion Police Station nga gi-parking sa biktima ang iyang motorsiklo duol sa balay sa iyang ig-agaw, samtang diha ra usab siya sa duol niini nagbarog-barog samtang may gipaabot.
Dihang kalit lang gisignit sa suspetsado ang iyang motor, gisakyan ug gipadagan pahilayo sa maong lugar.
Maoy hinungdan nga nagpakitabang dayon siya kang Francisco Labastida, tanod sa maong lugar ug gigukod nila ang suspetsado hangtod nga nadakpan kini.
Giturn-over dayon nila kini ngadto sa kapolisan, ug gipangayoan kini sa kapolisan og birth certificate kay nagduda sila sa edad.
Gituohan sa kapolisan nga sakop sa sindikato sa mga carnapper og motorsiklo ang maong suspetsado.
Gihatod usab dayon nila kini ngadto sa buhatan sa DSWD sa lungsod aron maoy moatiman sa mga menor de edad nga madakpan sa kapolisan. - BANAT NEWS