Pedong mipaluyo sa lakang ni Cortes

CEBU, Philippines - Gipaluyohan sa kanhi mayor sa Dakbayan sa Mandaue, Alfredo “Pedong” Ouano ang tinguha karon ni Mayor Jonas Cortes nga mahimong lone congressional district ang Mandaue.

Si Pedong Ouano mipadayag niini atol sa iyang pagdawat sa pasidungog isip usa sa Most Outstanding Alumni sa Mandaue City Central School sa natad sa pagserbisyo sa gobyerno.

Matud pa ni Ouano nga nakita niya ang mga panglantaw ni Mayor Cortes ilabi na gayud kun ang Mandaue mahimong usa ka lone congressional district.

Gipasalig ni Ouano nga andam niya nga paluyohan ang tinguha ni Mayor Cortes pagkuha og pirma sa katawhan aron maduso ang People’s Initiatives.

“Kita mag-petition nga ma- lone district ang Mandaue,” pamahayag ni Ouano.

Dako ang pagtuo ni Pedong Ouano nga dako og ikatabang sa kalambuan sa Mandaue ang pagkahimo niini nga lone congressional district.

“Samot na nga kining atong Kongresista wa man gyud magpakabana, unta mahimo kini nga mopasar sila og balaudnon nga maghimong lone district ang Mandaue, tiaw mo kana naunhan na hinoon ta sa Lapulapu,” dugang ni Pedong Ouano.

Nakita ni Pedong ang maayong pagdumala karon ni Mayor Cortes sa dakbayan sa Mandaue ilabi na gayud sa pagpasaka sa tinuig nga buhis nga nakolekta niini.

“Mao nga atong i-ampo sa atong halangdon nga patron Senyor San Jose nga unta lamdagan unta kita, tabangan kita nga mahimong lone district ang siyudad sa Mandaue,” dugang ni Pedong.

Daghan ang mipaluyo sa tinguha ni Cortes lakip ni Mayor Teresa Alegado sa lungsod sa Consolacion, Mayor Paz Radaza sa dakbayan sa Lapu-Lapu.

Si Kongresista Tomas Osmeña sa dakbayan sa Sugbo ug ingon man si Kongresista Eduardo Gullas miingon usab nga angayan paminawon ni Kongresista Luigi Quisumbing ang katawhan.

Ang mga kapitan miduso usab og manifesto ngadto kang Luigi.

Nanawagan usab ang konseho sa Mandaue ni Luigi nga moduso na sa balaudnon labot sa maong katuyoan. (WC) (BANATNEWS)