PNoy gihangyo nga motudlo og mga representante sa sektor sa pamuo sa Central Visayas

CEBU, Philippines - Ang konseho sa siyudad sa Sugbo mihangyo ngadto kang Presidente Benigno Aquino III nga motudlo na og duha ka representante sa labor sector aron mahimong sakop sa Regional Tripartite Wages and Productivity Board sa Central Visayas (RTWPB-7).

Matud ni Konsehal Alvin Dizon nga panahon na nga butangan gyud og luna ang labor sector sa RTWPB aron tulin ang delebirasyon sa kasamtangang pagtuki sa gisang-at nga petisyon sa pipila ka mga grupo sa mamumuo kabahin sa pagpa-usbaw sa ilang suholan.

Samtang ang education director sa Association of Labor Unions-Trade Union Congress of the Philippines (ALU-TUCP) nga si Joy Lim nagpasalamat sa konseho sa siyudad gumikan kay makatabang kaayo kini kanila aron matagaan og pagtagad ang mamumuo.

“Importante man gyud nga dunay tingog ang labor sector diha sa board. Kay kung wala man gyu’y representante, dili maklaro ang deliberation sa among hangyo nga patas-an ang sweldo,” matud ni Lim.

Dugang pa niya nga grabe na kalisud karon ang panahon ilabi na nga mitaas na pod kagahapon ang presyo sa lana.

“Luoy intawon kaayo ang mga workers, mahal na kaayo ang gasolina, unya mahal na pod kaayo ang palitonon,” ni Lim pa.

Dili usab kombensido si Lim sa hulga sa mga dagkung kompaniya nga manira kung patas-an ang sweldo.

“Wala gyud ko kadungog og balita nga dunay usa ka kompaniya nga manira kay gipatas-an ang sweldo. Ang hinungdan nga manira ang usa ka kompaniya gumikan kay nihinay ang ilang produkto,” dugang ni Lim.

Miawhag si Lim ngadto sa mga kompaniya nga tagaan gyud unta og pagtagad ang hangyo sa ilang mga empleyado. (BDB) (BANATNEWS)