CEBU, Philippines - Usa ka nagpakaaron-ingnon nga polis kinsa nakigkonsabo sa usa ka drayber sa taxi ang nangilad ngadto sa usa ka internet café ug nisakiyo sa mga mahalong butang sama sa computer ug telebisyon didto sa sitio Libo barangay Tayud lungsod sa Liloan niadtong Lunes sa ala 1:15 sa hapon.
Ang biktima mao ang Jules Internet Café nga gipanag-iya ni Romeo Cabatu, 43 anyos, minyo, molupyo sa Jamesville Subdivision sa barangay Tayud.
Matud ni PO3 Allen Garciano sa Consolacion Police Station dihang nahinabi sa Banat News nga base sa ilang imbistigasyon ang giingong mangingilad nagsakay sa Park Roy taxi nga nagtangag sa plaka nga GXC-874.
Samtang nagbantay ang storekeeper nga si Jersam Estenereo, hingkod ang panuigon, kalit lang misulod ang mangingilad kinsa nagpaila nga usa ka polis ug dayon nangita sa tag-iya tungod kay gipatuo niini nga dunay nireklamo ngadto sa barangay hall kabahin sa law-ay nga pasundayag diha sa maong internet café.
Nagtuo ang biktima nga tinuod gyud nga polis ang nangita sa tag-iya gituman niini ang mando sa mangingilad nga dad-on ang duha ka Central Processing Unit (CPU) nga mokantidad og P26 mil ug LCD TV nga mokantidad ug P3,900.
Ang biktima nga store keeper nituman usab kini dihang gimanduan sa mangingilad nga moapil og sakay sa taxi nga nagparada sa gawas nga bahin kay gipatuo sila nga dad-on didto sa barangay hall.
Apan samtang nagdagan ang taxi namatikdan sa biktima nga paingon kini ngadto sa siyudad sa Mandaue hinungdan nga nireklamo si Estenereo ug sa maong sitwasyon gitionan siya og pusil sa mangingilad.
Napugos og kanaog ang biktima gikan sa taxi ug nilahos kini ngadto sa police station ug nagpa-blotter sa maong insidente. (BDB) (BANATNEWS)