CEBU, Philippines - Usa ka ex-convict nga sakop sa Batang Cebu (BC) .45 ug karon usa na ka security guard, nadakpan sa guwardya ug house detective human mangawat og upat ka swiss knife sulod sa 138 Mall sa dalan Colon ning dakbayan sa Sugbo kagahapon sa alas-11:00 sa bunatg.
Si Danny Booc, 32, ulitawo apan dunay kapuyo, lumad nga taga barangay Ermita ug karon nagpuyo sa sitio Abaning sa barangay Lipata sa lungsod sa Minglanilla, gi-turn over ngadto sa buhatan sa Theft and Robbery Section (TRS) sa Cebu City Police Office human hisakpi nga giluklok sa iyang bulsa ang upat ka swiss knife nga nagkantidad og P112 matag usa.
Si Manuel Abad sakop sa BPE Security Agency ug gidestino diha sa nahisgutang mall nga nahinabi sa Banat News mitug-an nga iya nang gipanid-an ang lihok sa suspetsado sa dihang misulod kini gumikan sa pagdudang manguha og mga baligya.
Matud niya nga sa dihang iyang nakit-an nga mikuha sa swiss knife ang suspek iya dayon kining gisundan ug girikisa ang bulsa sa short niini apan milugnot ug misukol kaniya hinungdan nga dali siyang nagpakitabang sa house detective nga si Wilbert Laroa.
Si Laroa mitug-an nga nagbarog ang ilang manager sa may entrance nga bahin sa dihang gitukmod ug giyatak-yatakan ang ilang manager dayon midagan paingon sa gawas ug iyang gigukod ug nadakpan.
Si Booc nangatarungan nga usa ra ka swiss knife ang iyang gikuha kay ang tulo niini gihatag ra kaniya sa iyang kaubang naila lang niya sa ngalang ‘Insik’.
Si Booc miangkong guwardya siya sa Jessa Security Agency ug nadistino sa barangay Tabunok apan mi-leave siya karong bag-o lang tungod kay bag-o lang nanganak ang iyang asawa.
Apan sa dihang gisukit-sukit ni Chief Insp. Bonifacio Garciano, hepe sa TRS, si Booc mitug-an nga usa siya ka ex-convict ug niadtong tuig 2009 siya nakagawas gikan sa Muntinlupa human siya nag-atubang og duha ka kasong Robbery with Homicide niadtong tuig 2003 gumikan sa kasong pagpanulis sa pasahero sa PUJ nga iya usab nga gidunggab.
Ang iyang tattoo sa BC .45 anaa sa tuong bahin sa iyang dapi-dapi samtang adunay laing mga tattoo sa walang bahin sa iyang dughan ug buko-buko. (BANATNEWS)