Giunay'g tigbas sa iyang higala angol

CEBU, Philippines - Angol ang usa ka lalaki human kini unaya og tigbas sa iyang suod nga silingan ug higala didto sa Sitio Carajay, Brgy. Gun-ob, dakbayan sa Lapulapu sa milabay’ng gabii.

Ang biktima mao si Dante Saranza, 37, minyo, ug residente sa maong dapit.

Samtang ang suspek mao si Joshwe Nacua, 22, ulitawo, silingan ug suod kaayong higala sa biktima.

Base sa imbestigasyon sa kapolisan nasuta nga sa alas 8:30 sa milabay’ng gabii gikang nag-inom ang duha uban sa ilang mga higala ug nalingaw kaayo sa ilang komedyahanay.

 Apan gumikan sa ilang kalasbag, kalit nga nagkalalis ang suspek ug ang biktima, ug dihang miinit na sila pag-ayo miuli ang suspek sa ilang balay.

Apan sa pagbalik niini nagdala na og sundang dayon gihabas niini ang ulo sa biktima.

Samdan ang ulo sa biktima ug natumba kini sa yuta nga naglunang sa kaugalingon niyang dugo.

 Ang mga higala nila nga si Jimmy Jumao-as ug Sadam maoy midali paghatod sa biktima ngadto sa Lapulapu City Hospital, apan gibalhin kini sa Vicente Sotto Memorial Medical Center sa dakbayan sa Sugbo

 Ang suspetsado padayon pa karong gipangita sa kapolisan human kini mosibat. (BANATNEWS)