Flyover nganlan og Scoutmaster Damazo

CEBU, Philippines - Giduso karong sugyot nga tawgong Scoutmaster Damazo flyover ang bag-o lang nahuman nga Mambaling flyover nga nahimutang sa barangay Mambaling, habagatang bahin sa siyudad sa Sugbo.

Kini pahinungod sa nitaliwan na nga scoutmaster nga si Sergio Damazo nga maoy nag- impluwensiya sa scouting dili lang dinhi sa Sugbo kun dili lakip na sa tibuok Kabisay-an ug Mindanao.

Si kanhi Dangerous Drug Board (DDB) Undersecretary ug kasamtangang Alumni president sa University of San Jose Recoletos (USJR) manlalaban Paul Clarence Oaminal maoy nagpasiugda niini human niya makita ang pagduso ni Damazo sa scouting advocacy ngadto sa publiko ug pribadong mga tunghaan niadtong buhi pa kini ug hangtud na sa iyang pagkamatay niadtong buwan sa Mayo tuig 2009.

Gipasabot ni Oaminal nga ang paghingalan og Scoutmaster Damazo flyover nianang Mambaling flyover makapahinumdom kini sa publiko sa kabililhon sa scouting ilabi na tukmang pagpatuman og disiplina sa tawo.

Kining maong mga butang maoy lig-ong ehemplo aron malikay ang mga batan-on sa pagpakabuang sa gidiling drugas nga maoy magtukmod nila paghimo og mga dautang buhat. Lakip na niini ang pagpahinumdom sa mga opisyal sa gobyerno nga kinahanglang mosulod sa trabaho sa hustong oras ug kanunay’ng andam sa bisan unsang kalihukan ug mga responsibilidad.

Nunot niini hingusgan usab ni Oaminal ang pagpahigayon og signature campaign alang niini atol sa Grand Alumni homecoming sa USJR high school department unya sa Hulyo 23, 2011 aron makakuha og suporta sa katumanan niini.

Nagplano usab si Oaminal nga ihatag ang makuha nga signature campaign sa konseho sa dakbayan alang sa ilang pagtuon.

Gawas niini mangayo usab og suporta si Oaminal kang kanhi kongresista Antonio Cuenco nga maoy naghatag og gahin dihang kongresista pa siya alang sa katukoran sa Mambaling flyover.

Hangyoon usab niya ang Boy Scout of the Philippines nga motabang sa iyang tinguha alang sa katumanan niini.  - BANAT NEWS