Gas station gitulis sikyu giunay sa armas

CEBU, Philippines - Nabulit sa bala ug namatay ang usa ka gwardiya nga nanalipod sa iyang gitrabahoang gasolinahan human gipusil sa mga tulisang nagmotorsiklo gamit ang kaugalingon niining armas pasado alas-3 sa hapon kagahapon diha sa barangay Tayud lungsod sa Consolacion.

Ang namatay nailhan nga si Rolly Brocka, 30, sakop sa Gador Security Agency kinsa nakaangkon og mga samad pinusilan sa kalawasan.    Samtang ang mga tulisan nga nagtabon sa ilang mga nawong sakay sa usa ka motorsiklo nga blue nga adunay rebeteng puti nga walay plaka miikyas padulong sa direksyon sa dakbayan sa Mandaue.

Sa pakighinabi sa Banat News ni PO3 Ronelito Montañez ang imbestigador sa maong kaso, kini mibutyag nga ang gitulis mao ang Phoenix Gasoline Station sa maong barangay.

Matud pa ni Montañez nga base sa gibutyag sa mga nakasaksi miabot ang mga tulisan ug midiretso sa cashier’s booth ug ang drayber midiretso og duol kang Brocka ug giilog ang KG-9 nga armas niini.

Si Brocka misukol sa maong tulisan apan ang backrider nga kauban sa naulahi mitabang pag-ilog sa armas hangtud nga nadisarmahan ang gwardiya ug giunay kaniya ang iyang armas. Human niini daling gikuha sa mga tulisan ang halin sa maong gasolinahan nga gibana-bana nga mokabat sa 150 mil ka pesos ug wala nay nahimo ang kahera.

Nakuha sa crime scene ang unom ka kabhang sa .9mm gikan sa KG-9 sa gwardiya.

Ang kapolisan nga daling miresponde sa maong alarma misuway og gukod sa mga tulisan apan nahanaw atol sa ilang ginukdanay dihang ang motorsiklo miliko sa barangay Labogon sa syudad sa Mandaue. Samtang ang hepe sa kapolisan sa lalawigan sa Sugbo Sr. Supt. Patrocinio Comendador mipadala na og mga sakop sa Special Reaction Unit (SRU) aron makatabang sa maong operasyon.

Dako ang pagduda ni Montañez nga sakop lang gihapon kini sa mga midagsang Mindanao Robbery Group. Kahinumduman nga ang kapolisan daan nang mipahibalo sa publiko kalabot sa pag-abot sa grupo sa Mindanao Robbery Group.

Hangtod ning pagpatik ning balita kasamtangan pa nga mipahigayon og operasyon ang kapolisan batok sa mga tulisan. (EIM)   - BANAT NEWS