Nagtakin og pusil nadakpan

CEBU, Philippines -  Nagtingkagol sa Talisay City detention cell ang usa ka 25-anyos nga lalaki human kini masikop niadtong Biyernes sa hapon sa mga polis kinsa nagpatrolya diha sa sitio Mananga, barangay Tabunok, dakbayan sa Talisay.

Ang suspetsado mao si Jomar Nangca, taga Bliss, barangay Lawaan III, Talisay giingong gipabantay diha sa tindahan sa usa ka furniture sa sitio Mananga.

Si Nangca nabantayan nila ni PO3 Benedicto Lasque, PO1 Michael Noynoy Valmoria, PO1 Danila Fernandez nga nagbagal ang hawak ug kadudahan ang lihok hinungdan nga ilaha kining giduol ug gisita.

Nasuta sa mga polis nga kalibre .45 nga pistola nga dunay tulo ka buhing bala ang giluklok ni Nangca diha sa iyang hawak.

Si Nangca wala makapakita og mga dokumento sa iyang pagdala sa nahisgutang pusil hinungdan nga giaresto siya sa mga polis.

Karong Lunes si Nangca gikatakdang pasakaan og kasong illegal possession of firearms. (BANAT NEWS)