Pacman motukod og mall sa Talisay

CEBU, Philippines - Ang Pambansang Kamao nga si Manny Pacquiao nagplanong mopalit og lote sa barangay San Isidro, dakbayan sa Talisay sumala ni Vice Mayor Alan Bucao.

Nasayran gikan kang Bucao nga upat ka ektarya ang gidak-on sa lote nga paliton ni Pacquiao aron tukoran og mall.

Miingon si Bucao nga kun matuman kini dili lang ang San Isidro maoy mabulahan kundili tibuok Talisay tungod kay daghan ang mahatagan og kahigayonan nga makatrabaho.

Gibutyag ni Bucao nga sa milabay’ng duha ka semana si Pacman surpresang mianha sa lugar ug mitan-aw sa lote.

Gibutyag sa bise mayor nga si Ariel Araw-araw sa Office of the Building Official (OBO) sa siyudad kinsa higala ni Pacman, ug si boxing promoter Wacky Salud maoy mipahibalo kaniya sa surpresang pagbisita ni Pacman sa maong dapit.

Dugang pa niya nga uban ni Pacman sa pagtan-aw sa lote si Ilocos Sur Governor Chavit Singson.

 Nanghinaut si Bucao nga mahinayon ang maong plano ni Pacman tungod kay makahatag kini og dakong kauswagan sa Talisay ug lakip na ang ubang lungsod sa unang distrito sa probinsiya sa Sugbo.

Busa usa ka resolusyon nga nagdapit nga mahinangpon kang Pacman ang giaprobahan dayon sa konseho sa dakbayan. (WC)(BANAT NEWS)