"No segregation no collection" ipatuman na

CEBU, Philippines - Hugot na nga ipatuman ugmang adlawa ang “No Segregation, No Collection” policy sa kinatibuk-ang dakbayan sa Sugbo.

Kini maoy gipahibalo ni Mayor Michael Rama kagahapon isip usa sa mga aksyon sa pagtak-op sa Inayawan Landfill apan adunay pipila ka bahin niini ang himoong processing area alang sa mga malata ug dili malata nga basura.

Gihan-ay na sa siyudad ang ilang mga ekipo nga maoy mogaling sa mga basura nga gikan sa mga barangay nga walay Material Recovery Facility (MRF).

Nasayran nga 23 pa lang gikan sa 80 ka mga barangay sa siyudad ang adunay MRF.

Gihangyo ni Mayor Rama ang mga opisyales sa barangay nga mopatuman sa maong balaod aron magpabilin nga limpiyo ang tibuok siyudad.

Samtang aminado si Konsehal Nida Cabrera nga moduyog gyud ang publiko ning maong kampanya aron mamintenar ang kahinlo sa palibot sa dakbayan.

Ang mga gipanggaling nga basura himoong abuno, ug uban pang mapuslanong produkto.

Samtang higpit nang ipatuman ang ‘no segregation, no collection’ nga balaod base sa City Ordinance 2031 ugma.

Matud pa ni Cabrera nga ang pagbahig sa basura kinahanglang magsukad sa matag panimalay, ug kinahanglang tumanon kini sa matag usa isip tinuod nga lungsoranon.

Ang mga malata nga basura kolektahon matag adlaw nga Lunes, Miyerkules, Biyernes ug Domingo, samtang ang dili malata kolektahon sa mga adlaw nga Martes, Huwebes ug Sabado.

Ipatawag sa DPS ang atensyon sa mga opisyales sa barangay kung dili kini mopatuman sa maong polisiya.

Nakaalerto usab karon ang mga sakop sa Barangay Environment Officers (BEO) ug mga Barangay Tanod aron mobantay sa mga badlongong tawo nga mopataka og labay sa ilang basura.

Nakigtambayayong usab karon ang siyudad ngadto sa sektor sa mga patigayon nga usa sa mga dagkong tinubdan sa basura ning dakbayan.  - BANAT NEWS