Tanod nga napusilan hataga'g reward

CEBU, Philippines - Gipasalig ni Mayor Michael Rama nga irekomendar niya nga hatagan og reward kadtong barangay tanod sa Barangay Tejero nga napusilan sa lalakeng gigukod niya sa milabay nga adlaw human kini maalarma kay nagdala og armas de fuego.

Ang maong tanod giila nga si Ramil Lim, 42, kinsa nasamdan sa walang bukton, samtang ang nakapusil kaniya mao si Bobby Arnel Cabahug, 24, ulitawo, taga barangay Mantuyong sa dakbayan sa Mandaue.

Ang suspek nagbitbit og KG9 sub-machine pistol ug nasigpatan kini sa mga risidente sa barangay Tejero busa gialarma dayon kini sa mga tanod ug sa kapolisan nga miresulta sa ginukdanay.

Mikatkat   ang suspetsado sa atop sa balay ni barangay konsehal Garry Lao nga nakapahugyaw sa mga tawo.

Apan padayon kining gisundan sa sakop sa Speed Cop sa Cebu City Traffic Division nga si SPO1 Junivan Villanueva.

Nagkanayon ang mayor nga iyang ipasusi sa Police Coordinating and Advisory Council ang kahimtang sa napusilan nga tanod aron masuta kung unsang matang sa ganti ug padungog nga mohaom niini.

Dugang pa ni Rama nga dili lalim ang gibuhat sa maong tanod kay sa iyang gihimo nahimutang sa dakong risgo   ang iyang kinabuhi.

Gidayeg usab sa mayor ang tibuok puwersa sa kapolisan ug tanod nga mitubag sa nahisgutang alarma. (BANAT NEWS)