2 gisuyaan giluba

CEBU, Philippines - Angol ang duha ka tawo nga gipanunggab sulod sa videokehan nga ilang giimnan sa dalan R. Colina sa Ibabao Estancia, dakbayan sa Mandaue alas 8:00 pasado ang takna sa miaging gabii.

Ang mga biktima mao sila si Lemuel Tapan, 21, nga taga barangay Basak , dakbayan sa Mandaue ug Mario Magalare, 20 , nga taga barangay Banilad sa mao gihapong dakbayan.

Si PO3 Leo Batigalao sa kapolisan sa Presinto 1 miila sa suspetsado nga si Elroy Arvillar Roda, 22, nga taga barangay Lagtang, dakbayan sa Talisay.

Matud pa ni PO3 Batigalao nga paingon na sa pagpanggawas ang mga biktima hinungdan nga miduol kini sa kahera kay mobayad sa ilang giinom.

Apan ang suspetsado kinsa naglingkod sa pikas lamesa kalit lang miduol sa mga biktima ug gipangluba kini sa iyang kutsilyo ug ang duha pulos gitaroyan sa ilang bukobuko.

Dugang pa ni PO3 Batigalao nga ang mga barangay tanod sa palibot kinsa naalarma dayon sa maong hitabo misikop dayon sa suspetsado.

 Ang duha dali nga gidala ngadto sa Mandaue City District Hospital apan gibalhin kini ngadto sa Vicente Sotto Memorial Medical Center sa dakbayan sa Sugbo.

Si PO3 Batigalao miingon nga nasuta nila nga ang mga biktima gisuyaan lang sa suspetsado. (WC)   - (BANAT NEWS)