Tindero nahadlok patyon ni Joavan

CEBU, Philippines - Ang tindero sa club house sa Vista Grande Subdivision sa barangay, Bulacao, dakbayan sa Talisay milayas tungod sa kahadlok nga patyon ni Joavan Fernandez.

Si Raymond Paran, tindero sa tindahan ni Ederlinda Anderson kinsa presidente sa homeowners sa nahisgutang subdivision ang mipasaka og kasong robbery with homicide batok sa sinagop ni Mayor Socrates Fernandez nga si Joavan.

Kini human nga giingong gipabuthan ni Joavan sa iyang pusil si Paran ug gipasanginlan usab si Joavan nga nanguha og duha ka litrong softdrinks gikan sa tindahan sa milabay’ng buwan.

Apan si Senior Inspector Errol Francis Deveyra ang officer-in-charge (OIC) sa Talisay City Police Station nga nahinabi sa Banat News kagahapon nagkanayon nga niadtong miaging Sabado pasado sa alas 10:00 sa buntag mitawag sa ilang buhatan si Anderson ug mitug-an nga si Paran milakaw nga nagbilin og suwat .

Kini nagkanayon nga “pasayloa ko mam nga wala mananghid nimo og tarong hina-ot unta ko mam nga makasabot ra ka sa akong problema tulo ka adlaw ko nagkurog-kurog sa akong kahadlok nga patyon unya ko ni Jovan kung magpadayon ko sa akong kaso, sige naman gud og ari si Jovan niingon siya ayaw jud ko palagota huna-hunaa sa makadaghan, tungod sa akong kahadlok nipirma na lang ko para wa lagi nay problema, human nako og pirma dili ko kapugngan ang akong kaugalingon nga mohawa, naglikay lang ko sa tanan mam, pasaylo-a tawon ko mam, nagkuha ra ko og P1,100 mam, maluoy tawon mo nako mam dili ko ganahan og samok mam, gitagaan ko ni Jovan P4,000 mam paghuman nako og pirma, ako nalang gidawat kay gamiton para sa akong papa salamat mam, sorry kaayo mam, pasaylo-a ko, salamat sa imong kaayo nga imong gihatag mam, kung subayon mam wala pa ko nakabawi nimo”.

Matud ni Deveyra nga gituohang niadtong Biyernes sa gabii milakaw si Paran tungod kay sa pagsusi niini ni Anderson sa tindahan niya diha sa club house wala na ang iyang sinaligan nga si Paran.

Nasayran usab base sa report sa DYAB Abante Pa Bisaya nga si Mayor Socrates Fernandez mibutyag nga mipirma si Paran og affidavit of desistance ug may kopya siya niini. - Uban ni Lesley Caminade Vestil/WC(BANAT NEWS)