CEBU, Philippines - Usa ka suspetsadong kawatan nasikop sa mga polis human kini mapusili sa wala hiilhing tawo didto sa Camella Homes, barangay Lawaan I, dakbayan sa Talisay sa miaging hapon.
Nakaangkon og usa ka samad pinusilan sa iyang paa si Jessie Ablin, 35, taga sitio Cruzan, barangay Bulacao, dakbayan sa Talisay.
Si PO3 Mikie Espina kinsa uban ni Inspector Ricardo Echavez sa pagtubag sa alarma, nagkanayon nga si Ablin misulod og usa ka balay sa Camella Homes ug nangayo og panabang tungod kay napusilan siya sa wala hiilhing tawo.
Si Ablin daling gidala sa mga polis ngadto sa Talisay City District Hospital.
Apan dihang wala pa mabalhin ngadto sa Vicente Sotto Memorial Medical Center si Ablin, miabot si Padre Amelito Ricalis sa Don Bosco Formation Center uban kang Edcel Echavez ug mitaho nga gilungkab ang nahisgutang formation center ug nadala sa kawatan ang nagkalain-laing electrical wire ug circuit breaker.
Ang nahisgutang formation center nahimutang usab diha sa Lawaan I. Dihang gipatan-aw sa kapolisan si Padre Ricalis kang Ablin, gitumbok sa pari nga si Ablin maoy milungkab sa formation house.
Ang mga nahisgutang butang nga gikawat na-recover sa mga polis gikan kang Ablin.
Si Espina nagkanayon usab nga base sa ilang nahipos nga report si Ablin giingong ilado kaayong kiriwan sa ilang lugar, hinuon wala pa kini record diha sa Talisay City Police Station. (WC) (BANAT NEWS)