CEBU, Philippines - Nabuslot ang tiyan sa usa ka drayber sa traysikol human dunggaba sa kaugalingon niining bayaw didto sa barangay Mactan, dakbayan sa Lapulapu sa miaging gabii.
Ang biktima mao si Charlie Linao, 27, samtang ang suspetsado mao usab si Danilo Cobol, hingkod, nga pulos nagpuyo sa maong dapit.
Si PO1 Franklin Bolaquia sa homicide section sa kapolisan sa maong dakbayan nga nahinabi sa Banat News miingon nga sa wala pa ang pagpanunggab gipahulaman sa suspetsado ang iyang motorsiklo ngadto sa biktima.
Apan matud pa ni PO1 Bolaquia nga dugay nga giuli sa biktima ang maong motorsiklo nga maoy hinungdan sa hilabihang kasuko sa suspetsado nga misangpot sa ilang lalis. Sa tantong lalis nahutdan na sa maayong pulong ang suspetsado ug mihari ang kainit sa balatian niini hangtod nga mikuha og kutsilyo sa ilang kusina dayon walay pupanagana nga gihansak sa tiyan sa biktima.
Ang biktima nga kuwang usab sa naantigohan bahin sa self defense wala makalikay sa kutsilyo nga mibuslot sa iyang tiyan.
Dali nga gidala ang biktima ngadto sa Lapulapu City District Hospital samtang padayon pang gipangita sa kapolisan ang suspetsado kinsa misibat human sa maong hitabo. (WC) - (BANAT NEWS)