CEBU, Philippines - Andam si Konsehal Nida Cabrera sa Dakbayan sa Sugbo nga mosagop sa panawagan sa mga environmentalist nga hingusgan ang pagpatuman sa proyekto bahin sa renewable energy aron maatiman pag-ayo ang kalikopan.
Si Cabrera kinsa maoy chair sa committee on environment sa konseho miingon nga himoon niya nga pilot episode ang pagsagop sa solar power program ug target niya nga kasugdan na kini pagtukod sa sunod tuig.
Dugang pa niya nga nindot ang maong plano sanglit dili kini makaguba sa estado sa kalikupan.
Amenado si Cabrera nga nag-atubang karon ang kalibotan og climate change maoy hinungdan nga dili matag-an ang dagan sa panahon.
Matud pa niya nga mahimong maayo nga sumbanan ang siyudad sa Sugbo sa taga laing lugar sa higayon nga mapatuman na nila ang bahin sa solar power project.
Samtang si Mayor Michael Rama mihangop sa maong ideya apan iya gihapon kining ipaubos sa higpit nga pagtoon ug mag-agad ang tanan kung pila ang magasto niini.
“Nindot gyud na ug iagi pa na nato sa cost analysis,” matud sa mayor.
Nagtapok kagahapon ang mga grupo sa nagkadaiyang sektor sa buhatan ni Mayor Rama ug mipalanog sa ilang suporta sa pagsagop sa renewable energy.
Adunay ipahigayon nga summit dinhi sa Sugbo sa sunod buwan ug una kini nga higayon dinhi sa Pilipinas nga dunay Renewable Energy Summit nga tambungan sa pipila ka sektor nga nagpakabana sa pagpangga sa kalikopan nga tambongan usab sa mga negosyante. (BANAT NEWS)